Aston Villa ka arritur një fitore të madhe në Premier League, duke mposhtur Chelsea me rezultat 2-1 në “Stamford Bridge”, në një ndeshje që ka pasur dy fytyra të ndryshme.

Chelsea e ka nisur më mirë takimin dhe ka krijuar disa raste në pjesën e parë. Presioni i vendasve është konkretizuar në minutën e tridhjetë e shtatë, kur pas një goditje nga këndi, Joao Pedro ka realizuar golin e epërsisë.

Villa ka pasur vështirësi në organizimin e lojës dhe ka shkuar në pushim në disavantazh minimal.

Në pjesën e dytë, skuadra mysafire ia ka dalur të reagojë. Pas disa zëvendësimeve, Aston Villa ka fituar më shumë hapësira në sulm dhe ka filluar ta rrezikojë portën kundërshtare. Ollie Watkins e ka barazuar rezultatin pas një aksioni individual, duke përfituar edhe nga një devijim i portierit.

Sulmuesi anglez nuk është ndalur me kaq. Në minutën e tetëdhjetë e katërt, ai ka realizuar edhe golin e fitores me kokë, pas një krosimi të saktë nga krahu, duke siguruar tri pikë shumë të vlefshme për ekipin e tij.

Kjo ka qenë fitorja e njëmbëdhjetë radhazi për Aston Villa, e cila vazhdon ndjekjen e kreut të tabelës dhe mbetet vetëm tri pikë larg Arsenal në krye. E Chelsea ka pësuar humbjen e parë pas katër ndeshjesh pa humbje dhe aktualisht renditet në vendin e pestë në Premier League.